|

Тағйири Мўҳлати Пардохти Боҷи Гумрукӣ Ва Андоз

Тартибдиханда: Раҷабов Р.К., Ҷабборов А., Самиев Ф.Б.

Дохил кард: Алишер Фозилов

Санаи дохилгардида: 2015-12-07

Дар Тоҷикистон ҳукумати ҷумҳурӣ дар асоси КГҶТ тартиби тағйир додани мўҳлати пардохти боҷҳои гумрукӣ ва андозро муқаррар менамояд. Мўҳлати пардохти боҷҳои гумрукӣ ва андоз бо роҳи батаъхиргузорӣ ё тамдиди мўҳлат тағйир дода мешавад. Иҷозати батаъхиргузорӣ ё тамдиди мўҳлат метавонад барои пардохти боҷҳои гумрукӣ ва андоз танҳо ҳангоми мавҷуд будани асосҳои пешбининамудаи моддаи 380 КГҶТ рад карда шавад. Батаъхиргузорӣ ё тамдиди мўҳлат барои пардохти боҷи гумрукӣ ва андоз метавонад нисбати як ё якчанд намуди боҷҳои гумрукӣ ва андоз, инчунин барои тамоми маблағи пардохтшаванда ё қисме аз он иҷозат дода шавад. Инчунин батаъхиргузорӣ ё тамдиди мўҳлати пардохти боҷи гумрукӣ ва андоз ба шарти таъмини пардохти боҷҳои гумрукӣ ва андоз бо тартиби пешбининамудаи боби 46 КГҶТ иҷозат дода мешавад. Муайян шудааст, ки батаъхиргузорӣ ё тамдиди мўҳлати супоридани боҷҳои гумрукӣ ва андоз аз 1 то 6 моҳ фароҳам оварда мешавад. Дар ин раванд қарор дар бораи додани иҷозати батаъхиргузорӣ ё тамдиди мўҳлати пардохти боҷҳои гумрукӣ ва андоз ё надодани чунин иҷозат ба маълумоти аризадиҳанда ба таври хаттӣ расонида мешавад. Дар қарор муддати ба таъхиргузорӣ ё тамдиди мўҳлат барои пардохти боҷҳои гумрукӣ ва андоз ва дар сурати надодани чунин иҷозат сабаби чунин тасмим зикр мегардад. Бояд қайд намоем, ки иҷозати батаъхиргузорӣ ё тамдиди мўҳлати пардохти боҷҳои гумрукӣ ва андоз ба пардохткунандаи боҷҳои гумрукӣ ва андоз дар сурати вуҷуд доштани ақаллан яке аз асосҳои зерин дода мешавад: 1) зарар дидани ин шахс дар натиҷаи офати табиӣ, фалоқати технологӣ ё ҳодисаҳои дигари рафънопазир; 2) молрасониро дар асоси созишномаҳои байниҳукуматӣ ба ўҳда доштани шахс; 3) дигар ҳолатҳои истисноии муайяннамудаи Ҳукумати Ҷумҳурии Тоҷикистон. Бояд қайд намоем, ки дар Тоҷикистон батаъхиргузорӣ ё тамдиди мўҳлати пардохти боҷҳои гумрукӣ ва андоз иҷозат дода намешавад, ба шарте агар нисбати шахси талабгори батаъхиргузорӣ ё тамдиди мўҳлат: 1) парвандаи ҷиноятӣ ё парвандаи маъмурӣ ба сабаби вайрон кардани қонунгузории гумруки Ҷумҳурии Тоҷикистон оғоз шуда бошад; 2) расмиёти муфлисшавӣ оғоз шуда бошад. 2. Дар сурати мавҷуд будани сабабҳои дар қисми якуми ҳамин модда зикршуда қарори батаъхиргузорӣ ё тамдиди мўҳлати пардохти боҷҳои гумрукӣ ва андоз наметавонад қабул карда шавад ва қарори қабулшуда бояд бекор карда шавад ва дар ин бора дар давоми 3 рўзи корӣ ба маълумоти аризадиҳанда ба таври хаттӣ расонида шавад. Барои батаъхиргузорӣ ё тамдиди мўҳлати пардохти боҷҳои гумрукӣ ва андоз, инчунин дар ҳолатҳои дигари пешбининамудаи зерфасли 2 фасли II КГҶТ фоизи маблағи қарзи пардохти боҷҳои гумрукӣ ва андоз мутобиқи қонунгузории андози Ҷумҳурии Тоҷикистон ситонида мешавад. Фоизҳо пеш аз пардохти қарз ё ҳамзамон бо пардохти маблағи қарзи боҷҳои гумрукӣ ва андоз, вале на дертар аз рўзи дигари гузаштани мўҳлати ба таъхир гузошташуда ё мўҳлати тамдиди пардохти боҷҳои гумрукӣ ва андоз супорида мешаванд. Инчунин фоизи қарз бо тартиби пешбининамудаи КГҶТ нисбати пардохт, ситонидан ва баргардонидани боҷҳои гумрукӣ ва андоз пардохта, ситонида ва баргардонида мешавад. Боби 6.ТАЪМИНИ ПАРДОХТИ БОҶҲОИ ГУМРУКӢ ВА АНДОЗ Дар Тоҷикистон иҷрои вазифаи пардохти боҷҳои гумрукӣ ва андоз дар ҳолатҳои зерин таъмин карда мешавад: 1) батаъхиргузорӣ ё тамдиди мўҳлат барои пардохти боҷҳои гумрукӣ ва андоз; 2) шартан иҷозат додани мол; 3) интиқол ва (ё) нигоҳдории моли хориҷӣ; 4) фаъолият дар соҳаи гумрук. Инчунин агар маблағи пардохтшавандаи боҷи гумрукӣ, андоз ва фоизҳо камтар аз андозаи 150 - каратаи маоши ҳадди ақал бошад, таъмини пардохти боҷҳои гумрукӣ ва андоз пешниҳод карда намешавад. Ба ғайр аз ин агар ҳамон як шахс якчанд амалиёти гумрукиро дар муддати муайян анҷом диҳад, мақоми гумрук вазифадор аст таъмини пардохти боҷҳои гумрукӣ ва андозро барои анҷом додани ҳамаи чунин амалиёт (таъминоти генералӣ) қабул намояд. Мақомоти гумрук таъмини генералии пардохти боҷҳои гумрукӣ ва андозро барои анҷом додани амалиёти гумрукӣ дар якчанд мақомоти гумрук қабул мекунанд, ба шарте ки чунин таъминот барои ҳар як мақомоти гумрук дар сурати вайрон кардани ўҳдадориҳои тибқи КГҶТ таъмингардида истифода шавад. Таъмини пардохти боҷҳои гумрукӣ ва андоз аз тарафи шахси барои пардохти онҳо масъул ё аз тарафи ҳама гуна шахси дигар ба манфиати шахси масъули пардохткунандаи боҷҳои гумрукӣ ва андоз анҷом дода мешавад. Ба ғайр аз ин таъмини пардохти боҷҳои гумрукӣ ва андоз дар мўҳлати на дертар аз 3 рўзе, ки мақоми гумрук дар бораи иҷрои ўҳдадориҳои таъминшуда боварӣ ҳосил кард ё баъди қатъи фаъолияте, ки шарти он таъмини пардохти боҷи гумрукӣ ва андоз мебошад, баргардонида мешавад, ба истиснои гарави пулӣ, ки он мутобиқи моддаи 398 КГҶТ баргардонида мешавад. Дар ин раванд андозаи таъмини пардохти боҷҳои гумрукӣ ва андоз аз тарафи мақоми гумрук вобаста ба маблағи пардохтҳои гумрукӣ, фоизи пардохтшаванда ҳангоми иҷозати мол барои муомилоти озод ё баровардани он мутобиқи низоми гумрукии содирот муайян гардида, наметавонад аз андозаи маблағи мазкур зиёдтар бошад. Бояд қайд намоем, ки агар ҳангоми муайян кардани андозаи таъмини пардохти боҷҳои гумрукӣ ва андоз ба таври дақиқ муайян кардани боҷҳои гумрукӣ ва андози супоридашаванда бо сабаби ба мақоми гумрук пешниҳод нашудани маълумоти дақиқ дар бораи хусусияти мол, номгўй, миқдор, кишвари истеҳсолкарда ва арзиши гумрукии он имконпазир набошад, андозаи таъмини пардохт дар асоси андозаи калонтарини ставкаҳои боҷҳои гумрукӣ ва андоз, арзиши мол ва (ё) миқдори он, ки мумкин аст бар асоси маълумоти мавҷуда муайян гарданд, муайян карда мешавад. Дар ҳолати пешбининамудаи қисми 3 моддаи 153 КГҶТ андозаи таъмини пардохти боҷи гумрукӣ ва андозро мақоми гумрук ҳамчун фарқияти байни маблағи боҷҳои гумрукӣ ва андоз, ки мумкин аст ба таври илова, бо назардошти талаботи муқаррарнамудаи қисмҳои 1 ва 2 ҳамин модда ҳисоб карда шаванд ва маблағи боҷҳои гумрукӣ ва андози пардохтшуда муайян мекунад. Ба ғайр аз ин мақоми ваколатдор оид ба масъалаҳои фаъолияти гумрукӣ ҳуқуқ дорад андозаи муайяни таъмини пардохти боҷи гумрукиро нисбати намудҳои ҷудогонаи мол бо назардошти талаботи муқаррарнамудаи қисмҳои 1 ва 2 моддаи 383 КГҶТ муқаррар кунад. Дар Тоҷикистон таъмини супоридани пардохтҳои гумрукӣ аз тарафи шахсоне, ки дар соҳаи гумрук фаъолият мекунанд мавқеи хосро ишғол менамояд. Фаъолияти брокери гумрукӣ, соҳиби анбори нигоҳдории муваққатӣ, соҳиби анбори гумрукӣ, соҳиби анбори озод, соҳиби мағозаи савдои бебоҷ ва боркашони гумрукӣ ба таъмини пардохти боҷи гумрукӣ ва андоз вобаста аст. Бояд қайд намоем, ки андозаи таъмини пардохти боҷи гумрукӣ ва андоз ҳангоми машғул шудан бо ин намудҳои фаъолият наметавонад камтар аз ин ҳадд бошад: 1) аз андозаи 3000 - каратаи маоши ҳадди ақали муқаррарнамудаи қонун барои брокери гумрукӣ; 2) аз андозаи 150 - каратаи маоши ҳадди ақали муқаррарнамудаи қонун ва иловатан аз андозаи 4 - каратаи маоши ҳадди ақали муқаррарнамудаи қонун барои як метри мураббаъи масоҳати муфид, ба шарте ки ба сифати анбор майдончаи кушода истифода шавад ё андозаи 2 - каратаи маоши ҳадди ақали муқаррарнамудаи қонун барои 1 метри мукааби ҳаҷми муфиди бино, ба шарте ки бино ба сифати анборҳо барои соҳибони анборҳои нигоҳдории муваққатӣ, анбори озод, инчунин анборҳои гумрукии кушода ва пўшида истифода шавад; 3) андозаи 3000 - каратаи маоши ҳадди ақали муқаррарнамудаи қонун барои соҳиби мағозаи савдои бебоҷ; 4) андозаи 6000 - каратаи маоши ҳадди ақали муқаррарнамудаи қонун барои боркашонии гумрукӣ. Дар Тоҷикистон усулҳои гуногуни таъмини пардохти боҷҳои гумрукӣ ва андоз истифода бурда мешаванд. Пардохти боҷҳои гумрукӣ ва андоз бо тарзу усулҳои зерин таъмин мегардад: 1) ба гарав гузоштани мол ва амволи дигар; 2) кафолати бонкӣ; 3) гузаронидани маблағ ба кассаи мақоми гумрук ё ба суратҳисоби депозитии мақоми гумрук (гарави пулӣ) ; 4) замонат. Бояд қайд намоем, ки таъмини пардохти боҷҳои гумрукӣ ва андоз метавонад бо ҳама гуна усули пешбининамудаи КГҶТ тибқи интихоби пардохткунанда анҷом дода шавад. Ба гарав гузоштани мол ва амволи дигар Мавзўи гарав метавонад моли ба қаламрави гумрукии Ҷумҳурии Тоҷикистон воридшаванда ва инчунин амволи дигаре бошад, ки тибқи санадҳои меъёрии ҳуқуқии Ҷумҳурии Тоҷикистон мавзўи гарав буда метавонад. Гарав бо шартномаи миёни мақоми гумрук ва гаравгузор ба расмият дароварда мешавад. Гаравгузор метавонад шахси масъули пардохти боҷҳои гумрукӣ ва андоз ва ё ҳар шахси дигар бошад. Дар сурати дар назди мақомоти гумрук иҷро нашудани ўҳдадориҳои бо гарав таъмингардида маблағи қарзи пардохти боҷи гумрукӣ ва андоз аз тарафи мақомоти гумрук аз ҳисоби арзиши амволи ба гарав гузошташуда ба буҷети давлат гузаронида мешавад. Моли таҳти назорати гумрукӣ қарордошта ва ба мақомоти гумрукӣ ба сифати гарав вогузоршуда, инчунин амволи дигари ба гарав гузошташуда бо тартиби муқаррарнамудаи санадҳои меъёрии ҳуқуқии Ҷумҳурии Тоҷикистон ситонида мешавад. Кафолати бонкӣ Мақомоти гумрук ба сифати таъмини пардохти боҷҳои гумрукӣ ва андоз кафолатҳои бонкеро қабул мекунад, ки аз ҷониби бонкҳои ба Реестри бонкҳои аз тарафи мақоми ваколатдор оид ба масъалаҳои фаъолияти гумрукӣ (минбаъд - реестр) бо тартиби муайяннамудаи ин мақом бурда мешавад, дода шудааст. Мақоми ваколатдор оид ба масъалаҳои фаъолияти гумрукӣ вазифадор аст дар нашрияҳои расмии худ рўйхати бонкҳои ба Реестер дохилшударо ба таври мунтазам интишор намояд. Ҳангоми муносибатҳои ҳуқуқии вобаста ба додани кафолати бонкӣ, пешниҳод кардани талабот дар бораи кафолати бонкӣ, аз тарафи кафолатдиҳанда иҷро шудани ўҳдадориҳо ва қатъи кафолати бонкӣ муқаррароти қонунгузории Ҷумҳурии Тоҷикистон истифода бурда мешавад. Мақоми ваколатдор оид ба масъалаҳои фаъолияти гумрукӣ дар мувофиқа бо Бонки миллии Тоҷикистон барои бонкҳои ба Реестр дохилшуда ҳадди аксари маблағи як кафолати бонкӣ ва ҳадди аксари маблағи ҳамаи кафолатҳои бонкии ҳамзамон амалкунандаро, ки аз тарафи як бонк ё як ташкилот барои қабули кафолатҳои бонкӣ аз тарафи мақомоти гумрук бо мақсади таъмини пардохти боҷи гумрукӣ ва андоз дода шудаанд, муқаррар менамояд. Тартиби дохил намудани бонкҳо ба реестр Дар Тоҷикистон бонкҳо бо риояи шартҳои пешбининамудаи КГҶТ ба реестр дохил карда мешаванд. Барои дохил кардани бонк ба реестр музд ситонида намешавад. Шартҳои дохил шудани бонк ба реестр аз инҳо иборатанд: 1) мавҷуд будани иҷозатнома барои анҷоми амалиёти бонкӣ, ки аз тарафи Бонки миллии Тоҷикистон дода шудааст ва машғул будан бо фаъолияти бонкӣ на камтар аз 5 сол; 2) надоштани қарз оид ба пардохтҳои гумрукӣ ва дигар ўҳдадориҳо аз мақомоти гумрук ; 3) доштани сармояи оинномавии сабтшудаи бонк ба андозаи на камтар аз ҳаҷми 1,1 - каратаи ҳаҷми минималии сармояи оинномавии бонк, ки Бонки миллии Тоҷикистон муқаррар намудааст; 4) риояи меъёрҳои ҳатмии иқтисодӣ барои тамоми давраҳои ҳисоботӣ дар давоми охирин соли тақвимӣ. Инчунин шартҳои дохил намудани филиали бонк ба реестр аз инҳо иборатанд: 1) дохил кардани филиал аз ҷониби бонк ба Реестри ягонаи сабти давлатии намояндагӣ ва филиалҳои шахсони ҳуқуқӣ; 2) доштани ҳуқуқи додани кафолати бонкӣ аз тарафи филиал, ки дар Низомномаи он пешбинӣ шудааст; 3) мувофиқати бонки болоӣ ба шартҳои дохил намудан ба реестр ё ба реестр дохил кардани он; Бонк барои дохил шудан ба реестр ба мақоми гумрук бо ариза муроҷиат менамояд, ки он бояд маълумоти тасдиқкунандаи шартҳои дохилшавӣ ба реестр бошад ва ҳуҷҷатҳои зеринро пешниҳод менамояд: 1) бонк пешниҳод менамояд: - ҳуҷҷатҳои таъсисотӣ; - шаҳодатномаи бақайдгирии шахси ҳуқуқӣ; - иҷозатномаи Бонки миллии Тоҷикистон барои анҷом додани амалиёти бонкӣ; - корти расман тасдиқшудаи дорои намунаҳои имзои шахсони мансабдори бонк, ки ба онҳо ҳуқуқи имзо кардани кафолатҳои бонкӣ дода шудааст ва нақши мўҳри бонк; - ҳуҷҷати дорои ҳисобу китоби маблағи (сармояи) худ барои ҳар давраи ҳисоботии соли охирини тақвимӣ, ки бо имзои роҳбар ва сармуҳосиб ва бо мўҳр тасдиқ шудааст; - ҳисоботи балансии охирин давраи ҳисоботӣ, ки бо имзои роҳбар ва сарҳисобдор ва мўҳр тасдиқ шуда бошад; - ҳисобот дар бораи даромад ва зарари охирин давраи ҳисоботӣ, ки бо имзои роҳбар ва сармуҳосиб ва мўҳр тасдиқ шуда бошад; - маълумотнома дар бораи иҷрои меъёрҳои иқтисодии ҳатмӣ ва аҳамияти нишондодҳо барои ҳисобу китоби онҳо дар ҳар давраи ҳисоботи охирини соли тақвимӣ, ки бо имзои роҳбар, сармуҳосиб ва мўҳр тасдиқ шуда бошад; - нусхаи хулосаи аудиторӣ дар бораи эътимоднокии ҳисоботи бухгалтерии соли гузашта,ки ба он роҳбар ва сармуҳосиб имзо гузоштаанд ва бо мўҳр тасдиқ шуда бошад; 2) филиали бонк ба таври илова пешниҳод менамояд: - низомномаи филиал; - шаҳодатнома дар бораи дохил намудани филиали банк ба Реестри ягонаи сабти давлатии намояндагӣ ва филиалҳои шахсони ҳуқуқӣ; - корти расмӣ тасдиқшуда бо намунаҳои имзои шахсони мансабдори филиал, ки ба онҳо ҳуқуқи имзо кардани кафолатҳои бонкӣ дода шудааст ва нақши мўҳри филиал; Ҳуҷҷатҳои пешбининамуда мумкин аст, дар шакли асл ё нусхаи расман тасдиқшуда пешниҳод гарданд. Баъди баррасии ариза мақоми ваколатдор оид ба масъалаҳои фаъолияти гумрукӣ бояд бо дархости аризадиҳанда нусхаҳои асли ҳуҷҷатҳои пешниҳодшударо ба вай баргардонад. Мақоми ваколатдор оид ба масъалаҳои фаъолияти гумрукӣ аризаи дохил шудан ба реестрро дар мўҳлати на бештар аз 30 рўзи баъди гирифтани он баррасӣ намуда, дар бораи дохил кардани бонк ба реестр қарор қабул мекунад. Мақоми ваколатдор оид ба масъалаҳои фаъолияти гумрукӣ танҳо дар сурати риоя нашудани шартҳои дохилшавӣ ба реестр, ки дар қисми 2 ҳамин модда пешбинӣ шудаанд, дар бораи дохил накардан ба реестр қарор қабул мекунад. Қарори қабулшуда дар давоми 3 рўзи баъди қабул шудани он ба таври хаттӣ ба маълумоти аризадиҳанда расонида мешавад. Бағайр аз ин мақоми ваколатдор оид ба масъалаҳои фаъолияти гумрукӣ, ки аризаи дохил намудан ба реестрро баррасӣ менамояд, барои тасдиқи ҳуҷҷату маълумоти пешниҳоднамудаи аризадиҳанда ҳуқуқ дорад аз шахсони сеюм, инчунин мақомоти давлатӣ ҳуҷҷатҳои дорои маълумоти заруриро талаб намояд. Шахсони мазкур дар давоми 10 рўзи гирифтани дархост бояд ҳуҷҷатҳои талабшударо пешниҳод намоянд. Қарор дар бораи дохил накардан ба реестр танҳо дар сурати риоя нашудани шартҳои пешбининамудаи ҳамин модда метавонад қабул карда шавад. Ба аризадиҳанда хабарномаи дохил накардан ба реестр бо зикри сабабҳои қабули чунин қарор дар давоми 3 рўзи қабули он фиристода мешавад. Бонкҳо аз рўзи аввали моҳе, ки баъди моҳи қабул шудани қарори дохил шудан ба реестр фаро мерасад, ба реестр дохил карда мешаванд. Ба ғайр аз ин бонк бо қарори мақоми ваколатдор оид ба масъалаҳои фаъолияти гумрукӣ дар ҳолатҳои зерин аз реестр хориҷ карда мешавад: 1) барҳам хўрдан ё азнавташкилшавии бонк; 2) бозхонди иҷозатномаи иҷрои амалиёти бонкии бонк аз тарафи Бонки миллии Тоҷикистон ; 3) иҷро нашудани ҳатто яке аз шартҳои дохилшавӣ ба реестр; 4) иҷро нашудани ўҳдадориҳои марбут ба кафолати бонкӣ; 5) гузаштани як сол аз рўзи дохилшавӣ ба реестр, ба шарте агар то гузаштани мўҳлати мазкур ариза дар бораи дубора дохил шудан ба Реестр бо тартиби муқарраргардида пешниҳод нашуда бошад. Хориҷ кардани бонк аз реестр амали кафолатҳои бонкиеро, ки онҳо додаанд ва мақомоти гумрукӣ қабул кардаанд, қатъ намегардонад ва онҳоро аз масъулияти иҷро накардан ё иҷрои номатлуби шартҳои чунин кафолатҳои бонкӣ озод намегардонад. Бонки аз реестр хориҷшуда мумкин аст баъди як сол, ба шарти рафъи сабабҳои хориҷ шуданаш аз реестр, дубора ба он дохил карда шавад. Ба ғайр аз усулҳо номбаршуда супоридани маблағ ба суратҳисоби депозитии мақоми гумрук (гарави пулӣ) мавқеи хосро ишғол менамояд. Маблағи ба касса ё суратҳисоби депозитии мақоми гумруки Ҷумҳурии Тоҷикистон ба сифати таъмини пардохти боҷи гумрукӣ ва андоз (гарави пулӣ) бо асъори Тоҷикистон ё арзи хориҷӣ, ки қурби онро Бонки миллии Тоҷикистон муайян мекунад, супурда мешавад. Фоиз ба маблағи гарави пулӣ ҳисоб карда намешавад. Ҳангоми иҷро накардани ўҳдадориҳои бо гарави пулӣ таъмингардида маблағи пардохтҳои гумрукӣ, фоизи пардохтшаванда ба буҷети давлатӣ аз маблағи гарави пулӣ гузаронида мешавад. Баъди иҷрои ўҳдадориҳои бо гарави пулӣ таъмингардида маблағи супоридашуда мувофиқи моддаи 398 КГҶТ баргардонида мешавад ё мувофиқи хоҳиши супоранда метавонад ба ҳисоби пардохтҳои гумрукии оянда ё барои таъмини супурдани пардохтҳои гумрукӣ тибқи ўҳдадории дигар дар назди мақомоти гумрук истифода шавад. Барои тасдиқи супоридани гарави пулӣ ба шахсе, ки ба кассаи мақомоти гумрук ё ба суратҳисоби депозитии мақомоти гумрук пул супоридааст, забонхати гумрукие дода мешавад, ки намуна ва тартиби истифодаи онро мақоми ваколатдор оид ба масъалаҳои фаъолияти гумрукӣ бо розигии мақоми давлатии ваколатдор дар соҳаи молия мутобиқи моддаи 398 КГҶТ муайян мекунад. Забонхати гумрукиро ба шахси дигар додан мумкин нест. Замонат Дар Тоҷикистон замонат мувофиқи қонунгузории граждании Ҷумҳурии Тоҷикистон бо роҳи бастани шартнома миёни мақоми гумрук ва зомин ба расмият дароварда мешавад. Брокерҳои гумрукӣ, соҳибони анборҳои нигоҳдории муваққатии гумрукӣ, соҳибони анборҳои гумрукӣ, соҳибони мағозаҳои савдои бебоҷ, инчунин шахсони дигар метавонанд ба сифати зомин баромад намоянд.

Дидан карданд: 1263

Мавзӯъҳои монанд:

Идоракунии кормандон дар Мақомоти гумрук

Банақшагирии ташкили дар идоракунӣ дар Мақомоти гумрук

Ташкил ва танзим ҳамчун вазифаи идоракунӣ

Қабули қарорҳои идоракуни дар раванди идоракунӣ

Раванди идоракуни дар Мақомоти гумрук

Сохтори идоракунӣ дар Мақомоти гумрук

Хусусияти хоси идоракуни дар Мақомоти гумрук

Ташкили системаи идоракунӣ дар Мақомоти гумрукии Ҷумҳурии Тоҷикистон

Мақсад ва вазифаҳои фанни “Идоракуни ва ташкили фаъолияти гумрук”

Хироҷҳои гумруки ва намудҳои онҳо

Коментари дохил карданд:


Коментарии худро дохил кунед!

Суммаи ин ададҳоро нависед: